یادِ روزے کہ نفس سلسلۂ یا رب تھا

یادِ روزے کہ نفس سلسلۂ یا رب تھا

نالۂ دل بہ کمر دامنِ قطع شب تھا

بہ تحیّر کدۂ فرصتِ آرائشِ وصل

دلِ شب آئینہ دارِ تپشِ کوکب تھا

بہ تمنا کدۂ حسرتِ ذوقِ دیدار

دیدہ گو خوں ہو تماشائے چمن مطلب تھا

جوہرِ فکر پر افشانیٔ نیرنگِ خیال

حسن آئینہ و آئینہ چمن مشرب تھا

پردۂ دردِ دل آئینۂ صد رنگِ نشاط

بخیۂ زخمِ جگر خندۂ زیرِ لب تھا

نالہ ہا حاصلِ اندیشہ کہ جوں گشتِ سپند

دلِ نا سوختہ آتش کدۂ صد تب تھا

عشق میں ہم نے ہی ابرام سے پرہیز کیا

ورنہ جو چاہیے اسبابِ تمنا سب تھا

آخر کار گرفتارِ سرِ زلف ہوا

دلِ دیوانہ کہ وارستۂ ہر مذہب تھا

شوق سامان فضولی ہے وگرنہ غالبؔ

ہم میں سرمایۂ ایجادِ تمنا کب تھا

اسدؔ افسردگی آوارۂ کفر و دیں ہے

یادِ روزے کہ نفس در گرہِ یا رب تھا

yad-e-roze ke nafas silsila-e-ya rab tha

nala-e-dil ba kamar daman-e-qat-e-shab tha

ba tahayyur kada-e-fursat-e-araish-e-wasl

dil-e-shab aina dar-e-tapish-e-kaukab tha

ba tamanna kada-e-hasrat-e-zauq-e-didar

dida go khun ho tamasha-e-chaman matlab tha

jauhar-e-fikr par afshani-e-nairang-e-khayal

husn aina-o-aina chaman mashrab tha

parda-e-dard-e-dil aina-e-sad rang-e-nishat

bakhiya-e-zakhm-e-jigar khanda-e-zer-e-lab tha

nala ha hasil-e-andesha ke jun gasht-e-sapnad

dil-e-na sokhta atish kada-e-sad tab tha

ishq mein ham ne hi ibram se parhez kiya

warna jo chahiye asbab-e-tamanna sab tha

akhir kar giraftar-e-sar-e-zulf hua

dil-e-diwana ke warasta-e-har mazhab tha

shauq saman fazuli hai wagarna ghalib

ham mein sarmaya-e-ijad-e-tamanna kab tha

asad afsurdagi awara-e-kufr-o-din hai

yad-e-roze ke nafas dar girah-e-ya rab tha