بتائیں ہم تمھارے عارض و کاکُل کو کیا سمجھے

بتائیں ہم تمھارے عارض و کاکُل کو کیا سمجھے

اِسے ہم سانپ سمجھے اور اُسے من سانپ کا سمجھے

یہ کیا تشبیہِ بے ہودہ ہے کیوں موذی سے نسبت دیں

ہُما عارض کو اور کاکل کو ہم ظلِّ ہما سمجھے

غلط ہی ہو گئی تشبیہ یہ تو ایک طائر ہے

اسے برگِ سمن اور اُس کو سنبل کی جٹا سمجھے

نباتاتِ زمیں سے کیا ان کو نسبت معاذ اللّٰہ

اسے برق اور اُسے ہم کالی ساون کی گھٹا سمجھے

گھٹا اور برق سے کیوں کر گھٹا کر ان کو نسبت دیں

اسے ظلمات اُسے ہم چشمۂ آبِ بقا سمجھے

جو کہیے یہ فقط مقصود تھا خضر و سکندر سے

یدِ بیضا اسے اور اُس کو موسیٰ کا عصا سمجھے

جو اس تشبیہ سے بھی داغ اُن دونوں کو آتا ہو

اسے وقتِ نمازِ صبح اور اُس کو عشاء سمجھے

جو یہ نسبت پسندِ خاطرِ والا نہ ہو تو پھر

اسے قندیلِ کعبہ اُس کو کعبے کی ردا سمجھے

اسدؔ ان ساری تشبیہوں کو رد کرکے یہ کہتا ہے

سویدا اِس کو سمجھے اُس کو ہم نورِ خدا سمجھے

bataen ham tumhare ariz-o-kakul ko kya samjhe

ise ham sanp samjhe aur use man sanp ka samjhe

ye kya tashbih-e-be hoda hai kyun muzi se nisbat den

huma ariz ko aur kakul ko ham zill-e-huma samjhe

ghalat hi ho gai tashbih ye to ek tair hai

use barg-e-saman aur us ko sumbul ki juta samjhe

nabatat-e-zamin se kya un ko nisbat maaz allah

use barq aur use ham kali sawan ki ghata samjhe

ghata aur barq se kyun kar ghata kar un ko nisbat den

use zulmat use ham chashma-e-ab-e-baqa samjhe

jo kahiye ye faqat maqsud tha khizr-o-sikandar se

yad-e-baiza use aur us ko musa ka asa samjhe

jo is tashbih se bhi dagh un donon ko ata ho

use waqt-e-namaz-e-subh aur us ko asha samjhe

jo ye nisbat pasand-e-khatir-e-wala na ho to phir

use qindil-e-kaaba us ko kaabe ki rida samjhe

asad un sari tashbihon ko rad karke ye kahta hai

suwaida is ko samjhe us ko ham nur-e-khuda samjhe