مژہ پہلوئے چشم اے جلوۂ ادراک باقی ہے

مژہ پہلوئے چشم اے جلوۂ ادراک باقی ہے

ہوا وہ شعلہ داغ اور شوخیٔ خاشاک باقی ہے

چمن میں کچھ نہ چھوڑا تو نے غیر از بیضۂ قمری

عدم میں بہرِ فرقِ سرو مشتِ خاک باقی ہے

گدازِ سعیٔ بینش شست و شوے نقشِ خود کامی

سراپا شبنم آئیں یک نگاہِ پاک باقی ہے

ہوا ترکِ لباسِ زعفرانی دل کشا لیکن

ہنوز آفت نسب یک خندہ یعنی چاک باقی ہے

چمن زارِ تمنا ہو گئی صرفِ خزاں لیکن

بہارِ نیم رنگِ آہِ حسرت ناک باقی ہے

نہ حیرت چشمِ ساقی کی نہ صحبت دورِ ساغر کی

مری محفل میں غالبؔ گردشِ افلاک باقی ہے

mizha pahlu-e-chashm ai jalwa-e-idrak baqi hai

hawa wo shola dagh aur shokhi-e-khashak baqi hai

chaman mein kuchh na chhora tu ne ghair az baiza-e-qumri

adam mein bahr-e-farq-e-sarw musht-e-khak baqi hai

gudaz-e-sai-e-benash shist-o-shawe naqsh-e-khud kami

sarapa shabnam aen yak nigah-e-pak baqi hai

hawa tark-e-libas-e-zafrani dil kusha lekin

hanoz afat nasab yak khanda yaani chak baqi hai

chaman zar-e-tamanna ho gai sirf-e-khizan lekin

bahar-e-nim rang-e-ah-e-hasrat nak baqi hai

na hairat chashm-e-saqi ki na sohbat daur-e-saghar ki

miri mahfil mein ghalib gardish-e-aflak baqi hai