نہ بھولا اضطرابِ دم شماری انتظار اپنا

نہ بھولا اضطرابِ دم شماری انتظار اپنا

کہ آخر شیشۂ ساعت کے کام آیا غبار اپنا

ز بس آتش نے فصلِ رنگ میں رنگِ دگر پایا

چراغِ گل سے ڈھونڈے ہے چمن میں شمع خار اپنا

اسیرِ بے زباں ہوں کاشکہ صیادِ بے پروا

بہ دامِ جوہرِ آئینہ ہو جاوے شکار اپنا

مگر ہو مانعِ دامن کشی ذوقِ خود آرائی

ہوا ہے نقش بندِ آئینہ سنگِ مزار اپنا

دریغ اے ناتوانی ورنہ ہم ضبط آشنایاں نے

طلسمِ رنگ میں باندھا تھا عہدِ استوار اپنا

اگر آسودگی ہے مدعائے رنجِ بے تابی

نیازِ گردشِ پیمانۂ مے روزگار اپنا

اسدؔ ہم وہ جنوں جولاں گدائے بے سر و پا ہیں

کہ ہے سر پنجۂ مژگانِ آہو پشت خار اپنا

na bhula iztirab-e-dam shumari intizar apna

ke akhir shisha-e-saat ke kam aya ghubar apna

ze bas atish ne fasl-e-rang mein rang-e-digar paya

charagh-e-gul se dhunde hai chaman mein shama khar apna

asir-e-be zaban hun kashke sayyad-e-be parwa

ba dam-e-jauhar-e-aina ho jawe shikar apna

magar ho mane-e-daman kashi zauq-e-khud arai

hua hai naqsh band-e-aina sang-e-mazar apna

daregh ai natawani warna ham zabt ashnayan ne

tilism-e-rang mein bandha tha ahd-e-ustuwar apna

agar asudgi hai muddaa-e-ranj-e-be tabi

niyaz-e-gardish-e-paimana-e-mai rozgar apna

asad ham wo junun jaulan gadae be sar-o-pa hain

ke hai sar panja-e-mizhgan-e-ahu pusht khar apna