خدایا دل کہاں تک دن بہ صد رنج و تعب کاٹے

خدایا دل کہاں تک دن بہ صد رنج و تعب کاٹے

خمِ گیسو ہو شمشیرِ سیہ تاب اور شب کاٹے

کریں گر قدرِ اشکِ دیدۂ عاشق خود آرایاں

صدف دندانِ گوہر سے بہ حسرت اپنے لب کاٹے

دریغا وہ مریضِ غم کہ فرطِ ناتوانی سے

بہ قدرِ یک نفس جادہ بہ صد رنج و تعب کاٹے

یقیں ہے آدمی کو دست گاہِ فقر حاصل ہو

دمِ تیغِ توکل سے اگر پائے سبب کاٹے

ہوے یہ رہرواں دل خستہ شرمِ نا رسائی سے

کہ دستِ آرزو سے یک قلم پائے طلب کاٹے

اسدؔ مجھ میں ہے اُس کے بوسۂ پا کی کہاں جرات

کہ میں نے دست و پا باہم بہ شمشیرِ ادب کاٹے

khudaya dil kahan tak din ba sad ranj-o-taab kate

kham-e-gesu ho shamshir-e-siyah tab aur shab kate

karen gar qadar-e-ashk-e-dida-e-ashiq khud arayan

sadaf dandan-e-gauhar se ba hasrat apne lab kate

daregha wo mariz-e-gham ke fart-e-natawani se

ba qadar-e-yak nafas jada ba sad ranj-o-taab kate

yaqin hai admi ko dast gah-e-faqr hasil ho

dam-e-tegh-e-tawakkul se agar pae sabab kate

hue ye rahrawan dil khasta sharm-e-na rasai se

ke dast-e-arzu se yak qalam pae talab kate

asad mujh mein hai us ke bosa-e-pa ki kahan jurat

ke main ne dast-o-pa baham ba shamshir-e-adab kate