بہ مہرِ نامہ جو بوسہ گلِ پیام رہا

بہ مہرِ نامہ جو بوسہ گلِ پیام رہا

ہمارا کام ہوا اور تمھارا نام رہا

ہوا نہ مجھ سے بجز درد حاصلِ صیاد

بسانِ اشک گرفتارِ چشمِ دام رہا

دل و جگر تف فرقت سے جل کے خاک ہوئے

ولے ہنوز خیالِ وصال خام رہا

شکستِ رنگ کی لائی سحر شبِ سنبل

پہ زلفِ یار کا افسانہ نا تمام رہا

دہانِ تنگ مجھے کس کا یاد آیا تھا

کہ شب خیال میں بوسوں کا ازدحام رہا

نہ پوچھ حال شب و روزِ ہجر کا غالبؔ

خیالِ زلف و رخِ دوست صبح و شام رہا

ba mehr-e-nama jo bosa gul-e-payam raha

hamara kam hua aur tumhara nam raha

hawa na mujh se bajuz dard hasil-e-sayyad

basan-e-ashk giraftar-e-chashm-e-dam raha

dil-o-jigar taf furqat se jal ke khak hue

wale hanoz khayal-e-wisal kham raha

shikast-e-rang ki lai sahar shab-e-sumbul

pe zulf-e-yar ka afsana na tamam raha

dahan-e-tang mujhe kis ka yad aya tha

ke shab khayal mein boson ka izdiham raha

na puchh hal-e-shab-o-roz-e-hijr ka ghalib

khayal-e-zulf-o-rukh-e-dost subh-o-sham raha