جنبشِ ہر برگ سے ہے گل کے لب کو اختلاج

جنبشِ ہر برگ سے ہے گل کے لب کو اختلاج

حَبِّ شبنم سے صبا ہر صبح کرتی ہے علاج

شاخِ گل جنبش میں ہے گہوارہ آسا ہر نفس

طفلِ شوخِ غنچۂ گل بس کہ ہے وحشی مزاج

سیرِ ملکِ حسن کر مے خانہ ہا نذرِ خمار

چشمِ مستِ یار سے ہے گردنِ مینا پہ باج

گریہ ہائے بیدلاں گنجِ شرر در آستیں

قہرمانِ عشق میں حسرت سے لیتے ہیں خراج

رنگ ریز جسم و جاں نے از خمستانِ عدم

خرقۂ ہستی نکالا ہے بہ رنگِ احتیاج

ہے سوادِ چشمِ قربانی میں یک عالم مقیم

حسرتِ فرصت جہاں دیتی ہے حیرت کو رواج

اے اسدؔ ہے مستعدِ شانہ گیسو شدن

پنجۂ مژگاں بخود بالیدنی رکھتا ہے آج

jumbish-e-har barg se hai gul ke lab ko ikhtilaj

habb-e-shabnam se saba har subh karti hai ilaj

shakh-e-gul jumbish mein hai gahwara asa har nafas

tifl-e-shokh-e-ghuncha-e-gul bas ke hai wahshi mizaj

sair-e-mulk-e-husn kar mai khana ha nazr-e-khumar

chashm-e-mast-e-yar se hai gardan-e-mina pe baj

girya hae baidlan ganj-e-sharar dar astin

qahrman-e-ishq mein hasrat se lete hain khiraj

rang rez-e-jism-o-jan ne az khumistan-e-adam

khirqa-e-hasti nikala hai ba rang-e-ehtiyaj

hai sawad-e-chashm-e-qurbani mein yak alam muqim

hasrat-e-fursat jahan deti hai hairat ko riwaj

ai asad hai mustaid-e-shana gesu shadan

panja-e-mizhgan bakhud balidini rakhta hai aj