بلبلوں کو دور سے کرتا ہے منعِ بارِ باغ

بلبلوں کو دور سے کرتا ہے منعِ بارِ باغ

ہے زبانِ پاسباں خارِ سرِ دیوارِ باغ

کون آیا جو چمن بے تاب استقبال ہے

جنبشِ موجِ صبا ہے شوخیٔ رفتارِ باغ

میں ہمہ حیرت جنوں بے تابِ دورانِ خمار

مردمِ چشمِ تماشا نقطۂ پرکارِ باغ

آتشِ رنگِ رخِ ہر گل کو بخشے ہے فروغ

ہے دمِ سردِ صبا سے گرمیٔ بازارِ باغ

کون گل سے ضعف و خاموشیٔ بلبل کہہ سکے

نے زبانِ غنچہ گویا نے زبانِ خارِ باغ

جوشِ گل کرتا ہے استقبالِ تحریرِ اسدؔ

زیرِ مشقِ شعر ہے نقش از پئے احضارِ باغ

bulbulon ko dur se karta hai man-e-bar-e-bagh

hai zaban-e-pasban khar-e-sar-e-diwar-e-bagh

kaun aya jo chaman be tab istiqbal hai

jumbish-e-mauj-e-saba hai shokhi-e-raftar-e-bagh

main hama hairat junun be tab-e-dauran-e-khumar

mardum-e-chashm-e-tamasha nuqta-e-parkar-e-bagh

atish-e-rang-e-rukh-e-har gul ko bakhshe hai farogh

hai dam-e-sard-e-saba se garmi-e-bazar-e-bagh

kaun gul se zof-o-khamoshi-e-bulbul kah sake

ne zaban-e-ghuncha goya ne zaban-e-khar-e-bagh

josh-e-gul karta hai istiqbal-e-tahrir-e-asad

zer-e-mashq-e-sher hai naqsh az piye ehzar-e-bagh