فتادگی میں قدم استوار رکھتے ہیں

فتادگی میں قدم استوار رکھتے ہیں

بہ رنگِ جادہ سرِ کوئے یار رکھتے ہیں

برہنہ مستیٔ صبحِ بہار رکھتے ہیں

جنونِ حسرتِ یک جامہ دار رکھتے ہیں

طلسمِ مستیٔ دل آں سوئے ہجومِ سرشک

ہم ایک مے کدہ دریا کے پار رکھتے ہیں

ہمیں حریرِ شرر بافِ سنگ خلعت ہے

یہ ایک پیرہنِ زرنگار رکھتے ہیں

نگاہِ دیدۂ نقشِ قدم ہے جادۂ راہ

گزشتگاں اثرِ انتظار رکھتے ہیں

ہوا ہے گریۂ بے باک ضبط سے تسبیح

ہزار دل پہ ہم ایک اختیار رکھتے ہیں

بساطِ ہیچ کسی میں بہ رنگِ ریگِ رواں

ہزار دل بہ وداعِ قرار رکھتے ہیں

بہ رنگ سایہ سروکارِ انتظار نہ پوچھ

سراغِ خلوتِ شب ہائے تار رکھتے ہیں

جنونِ فرقتِ یارانِ رفتہ ہے غالبؔ

بسانِ دشت دلِ پُر غبار رکھتے ہیں

fatadagi mein qadam ustuwar rakhte hain

ba rang-e-jada sar-e-ku-e-yar rakhte hain

barahna masti-e-subh-e-bahar rakhte hain

junun-e-hasrat-e-yak jama dar rakhte hain

tilism-e-masti-e-dil an su-e-hujum-e-sarishk

ham ek mai kada dariya ke par rakhte hain

hamen harir-e-sharar baf-e-sang khilat hai

ye ek pairahan-e-zarnigar rakhte hain

nigah-e-dida-e-naqsh-e-qadam hai jada-e-rah

guzashtgan asar-e-intizar rakhte hain

hua hai girya-e-be bak zabt se tasbih

hazar dil pe ham ek ikhtiyar rakhte hain

bisat-e-hech kisi mein ba rang-e-reg-e-rawan

hazar dil ba wida-e-qarar rakhte hain

ba rang-e-saya sarokar-e-intizar na puchh

suragh-e-khalwat-e-shab ha-e-tar rakhte hain

junun-e-furqat-e-yaran-e-rafta hai ghalib

basan-e-dasht-e-dil-e-pur ghubar rakhte hain