رنگِ طرب ہے صورتِ عہدِ وفا گرو

رنگِ طرب ہے صورتِ عہدِ وفا گرو

تھا کس قدر شکستہ کہ ہے جا بجا گرو

پروازِ نقد دامِ تمنائے جلوہ تھا

طاؤس نے اک آئینہ خانہ رکھا گرو

عرضِ بساطِ انجمنِ رنگ مفت ہے

موجِ بہار رکھتی ہے اک بوریا گرو

ہر ذرّہ خاک عرضِ تمنائے رفتگاں

آئینہ ہا شکستہ و تمثال ہا گرو

ہے تاک میں سلم ہوسِ صد قدح شراب

تسبیحِ زاہداں بہ کفِ مدعا گرو

برق آبیارِ فرصتِ رنگِ دمیدہ ہوں

جوں نخلِ شمع ریشے میں نشو و نما گرو

طاقت بساطِ دستگہِ یک قدم نہیں

جوں اشک جب تلک نہ رکھوں دست و پا گرو

ہے وحشتِ جنونِ بہار اس قدر کہ ہے

بالِ پری بہ شوخیٔ موجِ صبا گرو

بے تابِ سیرِ دل ہے سرِ ناخنِ نگار

یاں نعل ہے بہ آتشِ رنگِ حنا گرو

ہوں سخت جانِ کاوشِ فکرِ سخن اسدؔ

تیشے کی کوہسار میں ہے یک صدا گرو

rang-e-tarab hai surat-e-ahd-e-wafa giro

tha kis qadar shikasta ke hai ja baja giro

parwaz-e-naqd dam-e-tamanna-e-jalwa tha

taus ne ik aina khana rakha giro

arz-e-bisat-e-anjuman-e-rang muft hai

mauj-e-bahar rakhti hai ik boriya giro

har zarra khak arz-e-tamanna-e-raftagan

aina ha shikasta-o-timsal ha giro

hai tak mein sullam hawas-e-sad qadah-e-sharab

tasbih-e-zahidan ba kaf-e-muddaa giro

barq abiyar-e-fursat-e-rang-e-damida hun

jun nakhl-e-shama reshe mein nashw-o-numa giro

taqat bisat-e-dastgah-e-yak qadam nahin

jun ashk jab talak na rakhun dast-o-pa giro

hai wahshat-e-junun-e-bahar is qadar ke hai

bal-e-pari ba shokhi-e-mauj-e-saba giro

be tab-e-sair-e-dil hai sar-e-nakhun-e-nigar

yan naal hai ba atish-e-rang-e-hina giro

hun sakht jan-e-kawish-e-fikr-e-sukhan asad

teshe ki kohsar mein hai yak sada giro