Arooz is now on the App Store, for iPhone and iPad. Download →

All poetry

رونے سے اور عشق میں بے باک ہو گئے

Mirza Ghalib (1797–1869)

رونے سے اور عشق میں بے باک ہو گئے

دھوئے گئے ہم ایسے کہ بس پاک ہو گئے

صرفِ بہائے مے ہوئے آلاتِ مے کشی

تھے یہ ہی دو حساب سو یوں پاک ہو گئے

رسوائے دہر گو ہوئے آوارگی سے تم

بارے طبیعتوں کے تو چالاک ہو گئے

کہتا ہے کون نالۂ بلبل کو بے اثر

پردے میں گُل کے لاکھ جگر چاک ہو گئے

پوچھے ہے کیا وجود و عدم اہلِ شوق کا

آپ اپنی آگ کے خس و خاشاک ہو گئے

کرنے گئے تھے اس سے تغافُل کا ہم گِلہ

کی ایک ہی نگاہ کہ بس خاک ہو گئے

پوچھے ہے کیا معاشِ جگر تُفتگانِ عشق

جوں شمع آپ اپنی وہ خوراک ہو گئے

اس رنگ سے اٹھائی کل اُس نے اسدؔ کی نعش

دشمن بھی جس کو دیکھ کے غم ناک ہو گئے