جوہرِ آئینہ ساں مژگاں بدل آسودہ ہے

جوہرِ آئینہ ساں مژگاں بدل آسودہ ہے

قطرہ جو آنکھوں سے ٹپکا سو نگاہ آلودہ ہے

دام گاہِ عجز میں سامانِ آسائش کہاں

پَر فشانی بھی فریبِ خاطرِ آسودہ ہے

اے ہوس عرضِ بساطِ نازِ مشتاقی نہ مانگ

جوں پرِ طاؤس یکسر داغِ مشک اندودہ ہے

ہے ریا کا رتبہ بالا تر تصور کردنی

تیرگی سے داغ کی مہ سیمِ مس اندودہ ہے

کیا کہوں پرواز کی آوارگی کی کشمکش

عافیت سرمایۂ بال و پرِ نکشودہ ہے

پنبۂ مینائے مے رکھ لو تم اپنے کان میں

مے پرستاں ناصحِ بے صرفہ گو بیہودہ ہے

جس طرف سے آئے ہیں آخر اُدھر ہی جائیں گے

مرگ سے وحشت نہ کر راہِ عدم پیمودہ ہے

ہے سوادِ خط پریشاں موئیٔ اہلِ عزا

خامہ میرا شمعِ قبرِ کشتگاں کا دودہ ہے

کثرتِ انشائے مضمونِ تحیر سے اسدؔ

ہر سرِ انگشت نوکِ خامۂ فرسودہ ہے

jauhar-e-aina san mizhgan badal asuda hai

qatra jo ankhon se tapka so nigah aluda hai

dam gah-e-ijz mein saman-e-asaish kahan

par fishani bhi fareb-e-khatir-e-asuda hai

ai hawas arz-e-bisat-e-naz-e-mushtaqi na mang

jun par-e-taus yaksar dagh-e-mushk andoda hai

hai riya ka rutba bala tar tasawwur kardini

tirgi se dagh ki mah sim-e-mis andoda hai

kya kahun parwaz ki awargi ki kashmakash

afiyat sarmaya-e-bal-o-par-e-nakshoda hai

pumba-e-mina-e-mai rakh lo tum apne kan mein

mai paristan naseh-e-be sarfa go behoda hai

jis taraf se ae hain akhir idhar hi jaenge

marg se wahshat na kar rah-e-adam paimuda hai

hai sawad-e-khat pareshan maui-e-ahl-e-aza

khama mera sham-e-qabr-e-kushtgan ka doda hai

kasrat-e-insha-e-mazmun-e-tahayyur se asad

har sar-e-angusht nok-e-khama-e-farsuda hai