دلِ بیمارِ از خود رفتہ تصویرِ نہالی ہے

دلِ بیمارِ از خود رفتہ تصویرِ نہالی ہے

کہ مژگاں ریشہ دارِ نیستانِ شیرِ قالی ہے

سرورِ نشۂ گردش اگر کیفیت افزا ہو

نہاں ہر گرد بادِ دشت میں جامِ سفالی ہے

عروجِ نشہ ہے سر تا قدم قدِ چمن رویاں

بجائے خود وگرنہ سرو بھی مینائے خالی ہے

ہوا آئینہ جامِ بادہ عکسِ روئے گلگوں سے

نشانِ خالِ رخ داغِ شرابِ پرتگالی ہے

بہ پائے خامۂ مو طے رہِ وصفِ کمر کیجے

کہ تارِ جادۂ سر منزلِ نازک خیالی ہے

اسدؔ اُٹھنا قیامت قامتوں کا وقتِ آرائش

لباسِ نظم میں بالیدنِ مضمونِ عالی ہے

dil-e-bimar-e-az khud rafta taswir-e-nihali hai

ke mizhgan resha dar-e-nistan-e-sher-e-qali hai

surur-e-nasha-e-gardish agar kaifiyat afza ho

nihan har gard-e-bad-e-dasht mein jam-e-sifali hai

uruj-e-nasha hai sar ta qadam qad-e-chaman rawiyan

bajae khud wagarna sarw bhi mina-e-khali hai

hawa aina jam-e-bada aks-e-roe gulgun se

nishan-e-khal-e-rukh dagh-e-sharab-e-purtugali hai

ba pae khama-e-mu tai rah-e-wasf-e-kamar kije

ke tar-e-jada-e-sar manzil-e-nazuk khayali hai

asad uthna qayamat qamaton ka waqt-e-araish

libas-e-nazm mein balidin-e-mazmun-e-ali hai