Arooz is now on the App Store, for iPhone and iPad. Download →

All poetry

شفق بدعویٔ عاشق گواہِ رنگیں ہے

Mirza Ghalib (1797–1869)

شفق بدعویٔ عاشق گواہِ رنگیں ہے

کہ ماہ دزدِ حنائے کفِ نگاریں ہے

کرے ہے بادہ ترے لب سے کسبِ رنگِ فروغ

خطِ پیالہ سراسر نگاہِ گل چیں ہے

کبھی تو اِس سرِ شوریدہ کی بھی داد ملے

کہ ایک عُمر سے حسرت پرستِ بالیں ہے

بجا ہے گر نہ سُنے نالہ ہائے بُلبلِ زار

کہ گوشِ گُل نمِ شبنم سے پنبہ آگیں ہے

عیاں ہے پائے حنائی بہ رنگِ پرتوِ خورشید

رِکاب روزنِ دیوارِ خانۂ زیں ہے

جبینِ صبح امیدِ فسانہ گویاں پر

درازیٔ رگِ خوابِ بتاں خطِ چیں ہے

ہوا نشانِ سوادِ دیارِ حسن عیاں

کہ خط غبارِ زمیں خیزِ زلفِ مشکیں ہے

نہ پوچھ کچھ سر و سامان و کار و بارِ اسدؔ

جنوں معاملہ بے دل فقیرِ مسکیں ہے

اسدؔ ہے نزع میں چل بے وفا برائے خُدا

مقامِ ترکِ حجاب و وداعِ تمکیں ہے