خود جان دے کے روح کو آزاد کیجیے

خود جان دے کے روح کو آزاد کیجیے

تاکے خیالِ خاطرِ جلّاد کیجیے

بھولے ہوئے جو غم ہیں انھیں یاد کیجیے

تب جاکے ان سے شکوۂ بے داد کیجیے

حالاں کہ اب زباں میں نہیں طاقتِ فغاں

پر دل یہ چاہتا ہے کہ فریاد کیجیے

بس ہے دلوں کے واسطے اک جنبشِ نگاہ

اجڑے ہوئے گھروں کو پھر آباد کیجیے

کچھ دردمند منتظرِ انقلاب ہیں

جو شاد ہو چکے انھیں ناشاد کیجیے

شاید کہ یاس باعثِ افشائے راز ہو

لطف و کرم بھی شاملِ بے داد کیجیے

بیگانۂ رسومِ جہاں ہے مذاقِ عشق

طرزِ جدیدِ ظلم کچھ ایجاد کیجیے

khud jan de ke ruh ko azad kijiye

take khayal-e-khatir-e-jallad kijiye

bhule hue jo gham hain unhen yad kijiye

tab jake un se shikwa-e-be dad kijiye

halan ke ab zaban mein nahin taqat-e-fughan

par dil ye chahta hai ke fariyad kijiye

bas hai dilon ke waste ik jumbish-e-nigah

ujre hue gharon ko phir abad kijiye

kuchh dardmand muntazir-e-inqilab hain

jo shad ho chuke unhen nashad kijiye

shayad ke yas bais-e-ifsha-e-raz ho

lutf-o-karam bhi shamil-e-be dad kijiye

begana-e-rusum-e-jahan hai mazaq-e-ishq

tarz-e-jadid-e-zulm kuchh ijad kijiye