حسنِ بے پروا گرفتارِ خود آرائی نہ ہو

حسنِ بے پروا گرفتارِ خود آرائی نہ ہو

گر کمیں گاہِ نظر میں دل تماشائی نہ ہو

ہیچ ہے تاثیرِ عالم گیرئی ناز و ادا

ذوقِ عاشق گر اسیرِ دامِ گیرائی نہ ہو

خود گدازِ شمع آغازِ فروغِ شمع ہے

سوزشِ غم درپئے ذوقِ شکیبائی نہ ہو

تار تارِ پیرہن ہے اک رگِ جانِ جنوں

عقلِ غیرت پیشہ حیرت سے تماشائی نہ ہو

بزمِ کثرت عالمِ وحدت ہے بینا کے لیے

بے نیازِ عشق اسیرِ زورِ تنہائی نہ ہو

ہے محبت رہزنِ ناموسِ انساں اے اسدؔ

قامتِ عاشق پہ کیوں ملبوسِ رسوائی نہ ہو

husn-e-be parwa giraftar-e-khud arai na ho

gar kamin gah-e-nazar mein dil tamashai na ho

hech hai tasir-e-alam geri naz-o-ada

zauq-e-ashiq gar asir-e-dam-e-girai na ho

khud gudaz-e-shama aghaz-e-farogh-e-shama hai

sozish-e-gham darpae zauq-e-shakebai na ho

tar tar-e-pairahan hai ik rag-e-jan-e-junun

aql-e-ghairat pesha hairat se tamashai na ho

bazm-e-kasrat alam-e-wahdat hai bina ke liye

be niyaz-e-ishq asir-e-zor-e-tanhai na ho

hai mohabbat rahzan-e-namus-e-insan ai asad

qamat-e-ashiq pe kyun malbus-e-ruswai na ho