ظاہرا سر پنجۂ افتادگاں گیرا نہیں

ظاہرا سر پنجۂ افتادگاں گیرا نہیں

ورنہ کیا حسرت کشِ دامن پہ نقشِ پا نہیں

آنکھیں پتھرائی نہیں نا محسوس ہے تارِ نگاہ

ہے زمیں از بس کہ سنگیں جادہ بھی پیدا نہیں

ہو چکے ہم جادہ ساں صد بار قطع اور پھر ہنوز

زینتِ یک پیرہن جوں دامنِ صحرا نہیں

ہو سکے ہے پردۂ جوشیدنِ خونِ جگر

اشک بعدِ ضبط غیر از پنبۂ مینا نہیں

ہو سکے کب کلفتِ دل مانعِ طوفانِ اشک

گردِ ساحل سنگِ راہِ جوششِ دریا نہیں

ہے طلسمِ دہر میں صد حشرِ پاداشِ عمل

آگہی غافل کہ یک امروز بے فردا نہیں

بسمل اس تیغِ دو دستی کا نہیں بچتا اسدؔ

عافیت بیزار ذوقِ کعبتین اچھا نہیں

zahiran sar panja-e-uftadagan gira nahin

warna kya hasrat kash-e-daman pe naqsh-e-pa nahin

ankhen pathrai nahin na mahsus hai tar-e-nigah

hai zamin az bas ke sangin jada bhi paida nahin

ho chuke ham jada san sad bar qata aur phir hanoz

zinat-e-yak pairahan jun daman-e-sahra nahin

ho sake hai parda-e-joshidin-e-khun-e-jigar

ashk baad-e-zabt ghair az pumba-e-mina nahin

ho sake kab kulfat-e-dil mane-e-tufan-e-ashk

gard-e-sahil sang-e-rah-e-joshish-e-dariya nahin

hai tilism-e-dahr mein sad hashr-e-padash-e-amal

agahi ghafil ke yak imroz be farda nahin

bismil is tegh-e-do dasti ka nahin bachta asad

afiyat bezar zauq-e-kaabaten achchha nahin