شکوہ و شکر کو ثمر بیم و امید کا سمجھ

شکوہ و شکر کو ثمر بیم و امید کا سمجھ

خانۂ آگہی خراب دل نہ سمجھ بلا سمجھ

ریگِ روان و ہر تپش درسِ تسلّیٔ شعاع

آئینہ توڑ اے خیال جلوے کو خوں بہا سمجھ

وحشتِ دردِ بے کسی بے اثر اس قدر نہیں

رشتۂ عمرِ خضر کو نالۂ نا رسا سمجھ

شوقِ عناں گسل اگر درسِ جنوں ہوس کرے

جادۂ سیرِ دو جہاں یک مژہ خوابِ پا سمجھ

گاہ بہ خلد امیدوار گہ بہ جحیم بیم ناک

گرچہ خدا کی یاد ہے کلفتِ ماسوا سمجھ

شوخیٔ حسن و عشق ہے آئینہ دارِ ہم دگر

خار کو بے نیام جان ہم کو برہنہ پا سمجھ

اے بہ سرابِ حسنِ خلق تشنۂ سعیٔ امتحاں

شوق کو منفعل نہ کر ناز کو التجا سمجھ

نغمۂ بے دلاں اسدؔ سازِ فسانگی نہیں

بسملِ دردِ خفتہ ہوں گریے کو ماجرا سمجھ

shikwa-o-shukr ko samar bim-o-umid ka samajh

khana-e-agahi kharab dil na samajh bala samajh

reg-e-rawan-o-har tapish dars-e-tasalli-e-shua

aina tor ai khayal jalwe ko khun baha samajh

wahshat-e-dard-e-be kisi be asar is qadr nahin

rishta-e-umr-e-khizr ko nala-e-na rasa samajh

shauq-e-inan gusil agar dars-e-junun hawas kare

jada-e-sair-e-do jahan yak mizha khwab-e-pa samajh

gah ba khuld umidwar gah ba jahim bim nak

garche khuda ki yad hai kulfat-e-masiwa samajh

shokhi-e-husn-o-ishq hai aina dar-e-ham digar

khar ko be niyam jan ham ko barahna pa samajh

ai ba sarab-e-husn-e-khalq tishna-e-sai-e-imtihan

shauq ko munfail na kar naz ko iltija samajh

naghma-e-be dalan asad saz-e-fasanagi nahin

bismil-e-dard-e-khufta hun giriye ko majra samajh