بہ قدرِ لفظ و معنی فکرت احرامِ گریباں ہیں

بہ قدرِ لفظ و معنی فکرت احرامِ گریباں ہیں

وگرنہ کیجیے جو ذرہ عریاں ہم نمایاں ہیں

عروجِ نشۂ واماندگی پیمانہ محمل تر

بہ رنگِ ریشۂ تاک آبلے جادے میں پنہاں ہیں

بہ وحشت گاہِ امکاں اتفاقِ چشم مشکل ہے

مہ و خورشید باہم سازِ یک خوابِ پریشاں ہیں

طلسمِ آفرینش حلقۂ یک بزمِ ماتم ہے

زمانے کے شبِ یلدا سے موئے سر پریشاں ہیں

یہ کس بے مہر کی تمثال کا ہے جلوہ سیمابی

کہ مثلِ ذرہ ہائے خاک آئینے پر افشاں ہیں

نہ انشا معنیٔ مضموں نہ املا صورتِ موزوں

عنایت نامہ ہائے اہلِ دنیا ہرزہ عنواں ہیں

مگر آتش ہمارا کوکبِ اقبال چمکاوے

وگرنہ مثلِ خارِ خشک مردودِ گلستاں ہیں

اسدؔ بزمِ تماشا میں تغافل پردہ داری ہے

اگر ڈھانپے تو آنکھیں ڈھانپ ہم تصویرِ عریاں ہیں

ba qadar-e-lafz-o-maani fikrat ehram-e-gareban hain

wagarna kijiye jo zarra uryan ham numayan hain

uruj-e-nasha-e-wamandagi paimana mahmil tar

ba rang-e-resha-e-tak able jade mein pinhan hain

ba wahshat gah-e-imkan ittifaq-e-chashm-e-mushkil hai

mah-o-khurshid baham saz-e-yak khwab-e-pareshan hain

tilism-e-afrinish halqa-e-yak bazm-e-matam hai

zamane ke shab-e-yalda se mu-e-sar pareshan hain

ye kis be mehr ki timsal ka hai jalwa simabi

ke misl-e-zarra hae khak aine par afshan hain

na insha maani-e-mazmun na imla surat-e-mauzun

inayat nama ha-e-ahl-e-duniya harza unwan hain

magar atish hamara kaukab-e-iqbal chamkawe

wagarna misl-e-khar-e-khushk mardud-e-gulistan hain

asad bazm-e-tamasha mein taghaful parda dari hai

agar dhanpe to ankhen dhanp ham taswir-e-uryan hain