مرگِ شیریں ہو گئی تھی کوہ کن کی فکر میں

مرگِ شیریں ہو گئی تھی کوہ کن کی فکر میں

تھا حریرِ سنگ سے قطعِ کفن کی فکر میں

فرصتِ یک چشمِ حیرت شش جہت آغوش ہے

ہوں سپند آسا وداعِ انجمن کی فکر میں

وہ غریبِ وحشت آبادِ تسلی ہوں جسے

کوچہ دے ہے زخمِ دل صبحِ وطن کی فکر میں

سایۂ گل داغ و جوشِ نکہتِ گل موجِ دُود

رنگ کی گرمی ہے تاراجِ چمن کی فکر میں

فالِ ہستی خار خارِ وحشتِ اندیشہ ہے

شوخیٔ سوزن ہے ساماں پیرہن کی فکر میں

غفلتِ دیوانہ جز تمہیدِ آگاہی نہیں

مغزِ سر خوابِ پریشاں ہے سخن کی فکر میں

مجھ میں اور مجنوں میں وحشت سازِ دعویٰ ہے اسدؔ

برگ برگِ بید ہے ناخن زدن کی فکر میں

marg-e-shirin ho gai thi koh kin ki fikr mein

tha harir-e-sang se qat-e-kafan ki fikr mein

fursat-e-yak chashm-e-hairat shash jihat aghosh hai

hun sapnad asa wida-e-anjuman ki fikr mein

wo gharib-e-wahshat abad-e-tasalli hun jise

kucha de hai zakhm-e-dil subh-e-watan ki fikr mein

saya-e-gul dagh-o-josh-e-nikhat-e-gul mauj-e-dud

rang ki garmi hai taraj-e-chaman ki fikr mein

fal-e-hasti khar khar-e-wahshat-e-andesha hai

shokhi-e-sozan hai saman pairahan ki fikr mein

ghaflat-e-diwana juz tamhid-e-agahi nahin

maghz-e-sar khwab-e-pareshan hai sukhan ki fikr mein

mujh mein aur majnun mein wahshat saz-e-daawa hai asad

barg barg-e-baid hai nakhun zadan ki fikr mein