گر یاس سر نہ کھینچے تنگی عجب فضا ہے

گر یاس سر نہ کھینچے تنگی عجب فضا ہے

وسعت گہِ تمنا یک بام و صد ہوا ہے

برہم زنِ دو عالم تکلیفِ یک صدا ہے

مینا شکستگاں کو کہسار خوں بہا ہے

فکرِ سخن یک انشا زندانیٔ خموشی

دودِ چراغ گویا زنجیرِ بے صدا ہے

موزونیٔ دو عالم قربانِ سازِ یک درد

مصراعِ نالۂ نَے سکتہ ہزار جا ہے

درسِ خرام تا کَے خمیازۂ روانی

اِس موجِ مے کو غافل پیمانہ نقشِ پا ہے

گردش میں لا تجلی صد ساغرِ تسلی

چشمِ تحیر آغوش مخمورِ ہر ادا ہے

یک برگِ بے نوائی صد دعوتِ نیستاں

طوفانِ نالۂ دل تا موجِ بوریا ہے

اے غنچۂ تمنا یعنی کفِ نگاریں

دل دے تو ہم بتا دیں مٹھی میں تیری کیا ہے

ہر نالۂ اسدؔ ہے مضمونِ داد خواہی

یعنی سخن کو کاغذ احرامِ مدعا ہے

gar yas sar na khinche tangi ajab faza hai

wusat gah-e-tamanna yak bam-o-sad hua hai

barham zan-e-do alam taklif-e-yak sada hai

mina shikastgan ko kohsar khun baha hai

fikr-e-sukhan yak insha zindani-e-khamoshi

dud-e-charagh goya zanjir-e-be sada hai

mauzuni-e-do alam qurban-e-saz-e-yak dard

masra-e-nala-e-nai sakta hazar ja hai

dars-e-khiram ta kai khamyaza-e-rawani

is mauj-e-mai ko ghafil paimana naqsh-e-pa hai

gardish mein la tajalli sad saghar-e-tasalli

chashm-e-tahayyur aghosh-e-makhmur-e-har ada hai

yak barg-e-be nawai sad daawat-e-nayastan

tufan-e-nala-e-dil ta mauj-e-boriya hai

ai ghuncha-e-tamanna yaani kaf-e-nigaren

dil de to ham bata den mutthi mein teri kya hai

har nala-e-asad hai mazmun-e-dad khwahi

yaani sukhan ko kaghaz ehram-e-muddaa hai