اگر گُل حسن و اُلفت کی بہم جو شیدنی جانے

اگر گُل حسن و اُلفت کی بہم جو شیدنی جانے

پرِ بلبل کے افسردن کو دامن چیدنی جانے

فسونِ حُسن سے ہے شوخیٔ گلگونہ آرائی

بہار اس کی کفِ مشاطہ میں بالیدنی جانے

نوائے بلبل و گل پاسبانِ بے دماغی ہے

بہ یک مژگانِ خوباں صد چمن خوابیدنی جانے

زہے شب زندہ دارِ انتظارستاں کہ وحشت سے

مژہ پیچک میں مہ کی سوزن آسا چیدنی جانے

خوشا مستی کہ جوشِ حیرتِ اندازِ قاتل سے

نگہ شمشیر میں جوں جوہر آرامیدنی جانے

جفا شوخ و ہوس گستاخِ مطلب ہے مگر عاشق

نفس در قالبِ خشتِ لحد دزدیدنی جانے

نوائے طائرانِ آشیاں گم کردہ آتی ہے

تماشا ہے کہ رنگِ رفتہ بر گردیدنی جانے

اسدؔ جاں نذرِ الطافے کہ ہنگامِ ہم آغوشی

زبانِ ہر سرِ مُو حالِ دل پرسیدنی جانے

agar gul husn-o-ulfat ki baham jo shedni jane

par-e-bulbul ke afsardin ko daman chidini jane

fusun-e-husn se hai shokhi-e-gulguna arai

bahar us ki kaf-e-mashshata mein balidini jane

nawa-e-bulbul-o-gul pasban-e-be dimaghi hai

ba yak mizhgan-e-khuban sad chaman khwabidini jane

zahe shab-e-zinda dar-e-intizarsitan ke wahshat se

mizha pechak mein mah ki sozan asa chidini jane

khusha masti ke josh-e-hairat-e-andaz-e-qatil se

nigah shamshir mein jun jauhar aramaidni jane

jafa shokh-o-hawas gustakh-e-matlab hai magar ashiq

nafas dar qalib-e-khisht-e-lahad duzdidini jane

nawa-e-tairan-e-ashiyan gum karda ati hai

tamasha hai ke rang-e-rafta bar gardidini jane

asad jan nazr-e-altafe ke hangam-e-ham aghoshi

zaban-e-har sar-e-mu hal-e-dil parsidini jane