خموشیوں میں تماشا ادا نکلتی ہے

خموشیوں میں تماشا ادا نکلتی ہے

نگاہ دل سے تری سُرمہ سا نکلتی ہے

فشارِ تنگیٔ خلوت سے بنتی ہے شبنم

صبا جو غنچے کے پردے میں جا نکلتی ہے

نہ پوچھ سینۂ عاشق سے آبِ تیغِ نگاہ

کہ زخمِ روزنِ در سے ہوا نکلتی ہے

بہ حلقۂ خمِ گیسو ہے راستی آموز

دہانِ مار سے گویا صبا نکلتی ہے

بہ رنگِ شیشہ ہوں یک گوشۂ دلِ خالی

کبھی پری مری خلوت میں آ نکلتی ہے

بہار شوخ و چمن تنگ و رنگِ گل دلچسپ

نسیم باغ سے پا در حنا نکلتی ہے

اسدؔ کو حسرتِ عرضِ نیاز تھی دمِ قتل

ہنوز یک سخنِ بے صدا نکلتی ہے

khamoshiyon mein tamasha ada nikalti hai

nigah-e-dil se tiri surma sa nikalti hai

fishar-e-tangi-e-khalwat se banti hai shabnam

saba jo ghunche ke parde mein ja nikalti hai

na puchh sina-e-ashiq se ab-e-tegh-e-nigah

ke zakhm-e-rauzan-e-dar se hua nikalti hai

ba halqa-e-kham-e-gesu hai rasti amoz

dahan-e-mar se goya saba nikalti hai

ba rang-e-shisha hun yak gosha-e-dil-e-khali

kabhi pari miri khalwat mein a nikalti hai

bahar shokh-o-chaman tang-o-rang-e-gul dilchasp

nasim-e-bagh se pa dar hina nikalti hai

asad ko hasrat-e-arz-e-niyaz thi dam-e-qatl

hanoz yak sukhan-e-be sada nikalti hai