پھونکتا ہے نالہ ہر شب صور اسرافیل کی

پھونکتا ہے نالہ ہر شب صور اسرافیل کی

ہم کو جلدی ہے مگر تو نے قیامت ڈھیل کی

کی ہیں کس پانی سے یاں یعقوب نے آنکھیں سفید

ہے جو آبی پیرہن ہر موج رودِ نیل کی

عرش پر تیرے قدم سے ہے دماغِ گردِ راہ

آج تنخواہِ شکستن ہے کُلہ جبریل کی

مدعا در پردہ یعنی جو کہوں باطل سمجھ

وہ فرنگی زادہ کھاتا ہے قسم انجیل کی

خیر خواہِ دید ہوں از بہرِ دفعِ چشم زخم

کھینچتا ہوں اپنی آنکھوں میں سلائی نیل کی

نالہ کھینچا ہے سراپا داغِ جرات ہوں اسدؔ

کیا سزا ہے میرے جرمِ آرزو تاویل کی

phunkta hai nala har shab sur-e-israfil ki

ham ko jaldi hai magar tu ne qayamat dhil ki

ki hain kis pani se yan yaaqub ne ankhen safed

hai jo abi pairahan har mauj rod-e-nil ki

arsh par tere qadam se hai dimagh-e-gard-e-rah

aj tankhwah-e-shaksatan hai kulah jibril ki

muddaa dar parda yaani jo kahun batil samajh

wo farangi zada khata hai qasam injil ki

khair khwah-e-did hun az bahr-e-daf-e-chashm-e-zakhm

khinchta hun apni ankhon mein sulai nil ki

nala khincha hai sarapa dagh-e-jurat hun asad

kya saza hai mere jurm-e-arzu tawil ki