بس کہ مے پیتے ہیں اربابِ فنا پوشیدہ

بس کہ مے پیتے ہیں اربابِ فنا پوشیدہ

خطِ پیمانۂ مے ہے نفسِ دزدیدہ

بہ غرورِ طرحِ قامت و رعنائیٔ سرو

طوق ہے گردنِ قمری میں رگِ بالیدہ

کی ہے وا اہلِ جہاں نے بہ گلستانِ جہاں

چشمِ غفلت نظرِ شبنمِ خور نادیدہ

اے دریغا کہ نہیں طبعِ نزاکت ساماں

ورنہ کانٹے میں تُلے ہے سخنِ سنجیدہ

یاس آئینۂ پیدائیٔ استغنا ہے

نا امیدی ہے پرستارِ دلِ رنجیدہ

واسطے فکرِ مضامینِ متیں کے غالبؔ

چاہیے خاطرِ جمع و دلِ آرامیدہ

bas ke mai pite hain arbab-e-fana poshida

khat-e-paimana-e-mai hai nafas-e-duzdida

ba ghurur-e-tarah-e-qamat-o-raanai-e-sarw

tauq hai gardan-e-qumri mein rag-e-balida

ki hai wa ahl-e-jahan ne ba gulistan-e-jahan

chashm-e-ghaflat nazar-e-shabnam-e-khur nadida

ai daregha ke nahin tab-e-nazakat saman

warna kante mein tule hai sukhan-e-sanjida

yas aina-e-paidai-e-istighna hai

na ummidi hai parastar-e-dil-e-ranjida

waste fikr-e-mazamin-e-maten ke ghalib

chahiye khatir-e-jama-o-dil-e-aramaida