چاکِ گریباں کو ہے ربطِ تامل ہنوز

چاکِ گریباں کو ہے ربطِ تامل ہنوز

غنچے میں دل تنگ ہے حوصلۂ گل ہنوز

دل میں ہے سودائے زلف مستِ تغافل ہنوز

ہے مژہِ خواب ناک ریشۂ سنبل ہنوز

پرورشِ نالہ ہے وحشتِ پرواز سے

ہے تہِ بالِ پری بیضۂ بلبل ہنوز

عشق کمیں گاہِ درد وحشتِ دل دور گرد

دامِ تہِ سبزہ ہے حلقۂ کاکل ہنوز

لذتِ تقریرِ عشق پردگیٔ گوشِ دل

جوہرِ افسانہ ہے عرضِ تحمل ہنوز

آئینۂ امتحاں نذرِ تغافل اسدؔ

شش جہت اسباب ہے وہمِ توکل ہنوز

chak-e-gareban ko hai rabt-e-taammul hanoz

ghunche mein dil-e-tang hai hausla-e-gul hanoz

dil mein hai sauda-e-zulf mast-e-taghaful hanoz

hai mizha-e-khwab nak resha-e-sumbul hanoz

parwarish-e-nala hai wahshat-e-parwaz se

hai tah-e-bal-e-pari baiza-e-bulbul hanoz

ishq kamin gah-e-dard wahshat-e-dil dur gard

dam-e-tah-e-sabza hai halqa-e-kakul hanoz

lazzat-e-taqrir-e-ishq pardagi-e-gosh-e-dil

jauhar-e-afsana hai arz-e-tahammul hanoz

aina-e-imtihan nazr-e-taghaful asad

shash jihat asbab hai wahm-e-tawakkul hanoz