رفتار سے شیرازۂ اجزائے قدم باندھ

رفتار سے شیرازۂ اجزائے قدم باندھ

اے آبلے محمل پئے صحرائے عدم باندھ

بے کاریٔ تسلیم بہر رنگ چمن ہے

گر خاک ہو گلدستۂ صد نقشِ قدم باندھ

اے جادے بہ سر رشتۂ یک ریشہ دویدن

شیرازۂ صد آبلہ جوں سبحہ بہم باندھ

حیرت حدِ اقلیمِ تمنائے پری ہے

آئینے پہ آئینِ گلستانِ ارم باندھ

پامردِ یک انداز نہیں قامتِ ہستی

طاقت اگر اعجاز کرے تہمتِ خم باندھ

دیباچۂ وحشت ہے اسدؔ شکوۂ خوباں

خوں کر دلِ اندیشہ و مضمونِ ستم باندھ

raftar se shiraza-e-ajza-e-qadam bandh

ai able mahmil piye sahra-e-adam bandh

be kari-e-taslim bahar rang-e-chaman hai

gar khak ho guldasta-e-sad naqsh-e-qadam bandh

ai jade ba sar rishta-e-yak resha dawidin

shiraza-e-sad abla jun subha baham bandh

hairat had-e-iqlim-e-tamanna-e-pari hai

aine pe ain-e-gulistan-e-iram bandh

pamard-e-yak andaz nahin qamat-e-hasti

taqat agar ejaz kare tohmat-e-kham bandh

dibacha-e-wahshat hai asad shikwa-e-khuban

khun kar dil-e-andesha-o-mazmun-e-sitam bandh