وضعِ نیرنگیٔ آفاق نے مارا ہم کو

وضعِ نیرنگیٔ آفاق نے مارا ہم کو

ہو گئے سب ستم و جَور گوارا ہم کو

دشتِ وحشت میں نہ پایا کسی صورت سے سراغ

گردِ جولانِ جنوں تک نے پکارا ہم کو

عجز ہی اصل میں تھا حاملِ صد رنگِ عروج

ذوقِ پستیٔ مصیبت نے ابھارا ہم کو

ضعف مشغول ہے بے کار بہ سعیٔ بیجا

کر چکا جوشِ جنوں اب تو اشارہ ہم کو

صورِ محشر کی صدا میں ہے افسونِ امّید

خواہشِ زیست ہوئی آج دوبارا ہم کو

تختۂ گور سفینے کے مماثل ہے اسدؔ

بحرِ غم کا نظر آتا ہے کنارا ہم کو

waz-e-nairangi-e-afaq ne mara ham ko

ho gae sab sitam-o-jaur gawara ham ko

dasht-e-wahshat mein na paya kisi surat se suragh

gard-e-jaulan-e-junun tak ne pukara ham ko

ijz hi asl mein tha hamil-e-sad rang-e-uruj

zauq-e-pasti-e-musibat ne ubhara ham ko

zof mashghul hai be kar ba sai-e-beja

kar chuka josh-e-junun ab to ishara ham ko

sur-e-mahshar ki sada mein hai afsun-e-ummid

khwahish-e-zist hui aj dobara ham ko

takhta-e-gor safine ke mumasil hai asad

bahr-e-gham ka nazar ata hai kinara ham ko