کب فقیروں کو رسائی بُتِ مے خوار کے پاس

کب فقیروں کو رسائی بُتِ مے خوار کے پاس

تونبے بو دیجیے مے خانے کی دیوار کے پاس

مُژدہ اے ذَوقِ اسیری کہ نظر آتا ہے

دامِ خالی قفَسِ مُرغِ گِرفتار کے پاس

جگرِ تشنۂ آزار تسلی نہ ہوا

جُوئے خُوں ہم نے بہائی بُنِ ہر خار کے پاس

مُند گئیں کھولتے ہی کھولتے آنکھیں ہَے ہَے

خُوب وقت آئے تم اِس عاشقِ بیمار کے پاس

مَیں بھی رُک رُک کے نہ مرتا جو زباں کے بدلے

دشنہ اِک تیز سا ہوتا مِرے غم خوار کے پاس

دَہَنِ شیر میں جا بیٹھیے لیکن اے دل

نہ کھڑے ہو جیے خُوبانِ دل آزار کے پاس

دیکھ کر تجھ کو چمن بس کہ نُمو کرتا ہے

خُود بخود پہنچے ہے گُل گوشۂ دستار کے پاس

مر گیا پھوڑ کے سر غالبؔ وحشی ہَے ہَے

بیٹھنا اُس کا وہ آ کر تری دِیوار کے پاس

kab faqiron ko rasai but-e-mai khwar ke pas

tonbe bu dijiye mai khane ki diwar ke pas

muzhda ai zauq-e-asiri ke nazar ata hai

dam-e-khali qafas-e-murgh-e-giraftar ke pas

jigar-e-tishna-e-azar tasalli na hua

ju-e-khun ham ne bahai bun-e-har khar ke pas

mand gain kholte hi kholte ankhen hai hai

khub waqt ae tum is ashiq-e-bimar ke pas

main bhi ruk ruk ke na marta jo zaban ke badle

dashna ik tez sa hota mire gham khwar ke pas

dahan-e-sher mein ja baithiye lekin ai dil

na khare ho jiye khuban-e-dil azar ke pas

dekh kar tujh ko chaman bas ke numu karta hai

khud bakhud pahunche hai gul gosha-e-dastar ke pas

mar gaya phor ke sar ghalib-e-wahshi hai hai

baithna us ka wo a kar tiri diwar ke pas