نِکوہِش ہے سزا فریادیٔ بیدادِ دِلبر کی

نِکوہِش ہے سزا فریادیٔ بیدادِ دِلبر کی

مبادا خندۂ دنداں نما ہو صبح محشر کی

رگِ لیلیٰ کو خاکِ دشتِ مجنوں ریشگی بخشے

اگر بو دے بجائے دانہ دہقاں نوک نشتر کی

پرِ پروانہ شاید بادبانِ کشتیٔ مے تھا

ہوئی مجلس کی گرمی سے روانی دَورِ ساغر کی

کروں بیدادِ ذوقِ پَر فشانی عرض کیا قدرت

کہ طاقت اُڑ گئی اڑنے سے پہلے میرے شہ پر کی

کہاں تک روؤں اُس کے خیمے کے پیچھے قیامت ہے

مری قسمت میں یا رب کیا نہ تھی دیوار پتھّر کی

مرا دل مانگتے ہیں عاریت اہل ہوس شاید

یہ جایا چاہتے ہیں آج دعوت میں سمندر کی

غرورِ لطفِ ساقی نشۂ بے باکیٔ مستاں

نمِ دامانِ عصیاں ہے طراوت موجِ کوثر کی

تھکا جب قطرہ بے دست و پا بالا دویدن سے

زِ بہرِ یادگاری ہا گرہ دیتا ہے گوہر کی

بہ جز دیوانگی ہوتا نہ انجامِ خود آرائی

اگر پیدا نہ کرتا آئینہ زنجیر جوہر کی

اسدؔ جز آب بخشیدن ز دریا خضر کو کیا تھا

ڈبوتا چشمۂ حیواں میں گر کشتی سکندر کی

nikohish hai saza fariyadi-e-bedad-e-dilbar ki

mabada khanda-e-dandan numa ho subh-e-mahshar ki

rag-e-laila ko khak-e-dasht-e-majnun reshagi bakhshe

agar bu de bajae dana dehqan nok-e-nashtar ki

par-e-parwana shayad badban-e-kashti-e-mai tha

hui majlis ki garmi se rawani daur-e-saghar ki

karun bedad-e-zauq-e-par fishani arz kya qudrat

ke taqat ur gai urne se pahle mere shah par ki

kahan tak roun us ke kheme ke pichhe qayamat hai

miri qismat mein ya rab kya na thi diwar patthar ki

mira dil mangte hain aret ahl-e-hawas shayad

ye jaya chahte hain aj daawat mein samundar ki

ghurur-e-lutf-e-saqi nasha-e-be baki-e-mustan

nam-e-daman-e-isyan hai tarawat mauj-e-kausar ki

thaka jab qatra be dast-o-pa bala dawidin se

zi bahr-e-yadgari ha girah deta hai gauhar ki

ba juz diwangi hota na anjam-e-khud arai

agar paida na karta aina zanjir jauhar ki

asad juz ab bakhshidin ze dariya khizr ko kya tha

dubota chashma-e-haiwan mein gar kashti sikandar ki