خبر نگہ کو نگہ چشم کو عدو جانے

خبر نگہ کو نگہ چشم کو عدو جانے

وہ جلوہ کر کہ نہ میں جانوں اور نہ تو جانے

نفس بہ نالہ رقیب و نگہ بہ اشک عدو

زیادہ اُس سے گرفتار ہوں کہ تو جانے

بہ کسوتِ عرقِ شرم قطرہ زن ہے خیال

مباد حوصلہ معذورِ جستجو جانے

جنوں فسردۂ تمکیں ہے کاش عہدِ وفا

گدازِ حوصلہ کو پاسِ آبرو جانے

نہ ہووے کیوں کہ اُسے فرض قتلِ اہلِ وفا

لہو میں ہاتھ کے بھرنے کو جو وضو جانے

زباں سے عرضِ تمنائے خامشی معلوم

مگر وہ خانہ بر انداز گفتگو جانے

مسیحِ کشتۂ اُلفت ببر علی خاں ہے

کہ جو اسدؔ تپشِ نبضِ آرزو جانے

khabar nigah ko nigah chashm ko adu jane

wo jalwa kar ke na main janun aur na to jane

nafas ba nala raqib-o-nigah ba ashk adu

ziyada us se giraftar hun ke tu jane

ba kiswat-e-araq-e-sharm-e-qatra zan hai khayal

mubad hausla maazur-e-justuju jane

junun fasurda-e-tamkin hai kash ahd-e-wafa

gudaz-e-hausla ko pas-e-abru jane

na howe kyun ke use farz qatl-e-ahl-e-wafa

lahu mein hath ke bharne ko jo wuzu jane

zaban se arz-e-tamanna-e-khamushi maalum

magar wo khana bar andaz-e-guftugu jane

masih-e-kushta-e-ulfat babar ali khan hai

ke jo asad tapish-e-nabz-e-arzu jane