عاشق نقابِ جلوۂ جانانہ چاہیے

عاشق نقابِ جلوۂ جانانہ چاہیے

فانوسِ شمع کو پرِ پروانہ چاہیے

ہے وصل ہجر عالمِ تمکین و ضبط میں

معشوقِ شوخ و عاشقِ دیوانہ چاہیے

اُس لب سے مل ہی جائے گا بوسہ کبھی تو ہاں

شوقِ فضول و جراتِ رندانہ چاہیے

پیدا کریں دماغِ تماشائے سرو و گل

حسرت کشوں کو ساغر و مینا نہ چاہیے

دیوانگاں ہیں حاملِ رازِ نہانِ عشق

اے بے تمیز گنج کو ویرانہ چاہیے

ساقی بہارِ موسمِ گل ہے سرور بخش

پیماں سے ہم گزر گئے پیمانہ چاہیے

جادو ہے یار کی روشِ گفتگو اسدؔ

یاں جز فسوں نہیں اگر افسانہ چاہیے

ashiq naqab-e-jalwa-e-janana chahiye

fanus-e-shama ko par-e-parwana chahiye

hai wasl hijr alam-e-tamkin-o-zabt mein

maashuq-e-shokh-o-ashiq-e-diwana chahiye

us lab se mil hi jaega bosa kabhi to han

shauq-e-fuzul-o-jurat-e-rindana chahiye

paida karen dimagh-e-tamasha-e-sarw-o-gul

hasrat kashon ko saghar-o-mina na chahiye

dewanigan hain hamil-e-raz-e-nahan-e-ishq

ai be tamiz ganj ko wirana chahiye

saqi bahar-e-mausam-e-gul hai surur bakhsh

paiman se ham guzar gae paimana chahiye

jadu hai yar ki rawish-e-guftugu asad

yan juz fusun nahin agar afsana chahiye