صد جلوہ رو بہ رو ہے جو مژگاں اٹھائیے

صد جلوہ رو بہ رو ہے جو مژگاں اٹھائیے

طاقت کہاں کہ دید کا احساں اٹھائیے

دل ہی نہیں کہ منتِ درباں اُٹھائیے

کس کو وفا کا سلسلہ جنباں اُٹھائیے

تا چند داغ بیٹھیے نقصاں اُٹھائیے

اب چار سوئے عشق سے دُکاں اُٹھائیے

ہستی فریب نامۂ موجِ سراب ہے

یک عمر نازِ شوخیٔ عنواں اُٹھائیے

ہے سنگ پر براتِ معاشِ جنونِ عشق

یعنی ہنوز منّتِ طفلاں اٹھائیے

دیوار بارِ منّتِ مزدور سے ہے خم

اے خانماں خراب نہ احساں اٹھائیے

یا میرے زخمِ رشک کو رسوا نہ کیجیے

یا پردۂ تبسّمِ پنہاں اٹھائیے

ضبطِ جنوں سے ہر سرِ مو ہے ترانہ خیز

یک نالہ بیٹھیے تو نیستاں اُٹھائیے

نذرِ خراشِ نالہ سرشکِ نمک اثر

لطفِ کرم بدولتِ مہماں اُٹھائیے

انگور سعیٔ بے سرو پائی سے سبز ہے

غالبؔ بہ دوشِ دل خُمِ مستاں اُٹھائیے

sad jalwa ru ba ro hai jo mizhgan uthaiye

taqat kahan ke did ka ehsan uthaiye

dil hi nahin ke minnat-e-darban uthaiye

kis ko wafa ka silsila jumban uthaiye

ta chand dagh baithiye nuqsan uthaiye

ab char su-e-ishq se dukan uthaiye

hasti fareb-e-nama-e-mauj-e-sarab hai

yak umr naz-e-shokhi-e-unwan uthaiye

hai sang par barat-e-maash-e-junun-e-ishq

yaani hanoz minnat-e-tiflan uthaiye

diwar bar-e-minnat-e-mazdur se hai kham

ai khanuman kharab na ehsan uthaiye

ya mere zakhm-e-rashk ko ruswa na kijiye

ya parda-e-tabassum-e-pinhan uthaiye

zabt-e-junun se har sar-e-mu hai tarana khez

yak nala baithiye to nayastan uthaiye

nazr-e-kharash-e-nala sarishk-e-namak asar

lutf-e-karam badaulat-e-mehman uthaiye

angur sai-e-be sarw pai se sabz hai

ghalib ba dosh-e-dil khum-e-mustan uthaiye