شیشۂ آتشیں رخِ پُر نور

شیشۂ آتشیں رخِ پُر نور

عرق از خط چکیدہ روغنِ مور

بس کہ ہوں بعدِ مرگ بھی نگراں

مردمک سے ہے خال بر لبِ گور

بار لاتی ہے دانہ ہائے سرشک

مژہ ہے ریشۂ رزِ انگور

ظلم کرنا گدائے عاشق پر

نہیں شاہانِ حُسن کا دستور

دوستو مجھ ستم رسیدہ سے

دشمنی ہے وصال کا مذکور

زندگانی پہ اعتماد غلط

ہے کہاں قیصرؔ اور کہاں فغفورؔ

کیجے جوں اشک اور قطرہ زنی

اے اسدؔ ہے ہنوز دلی دور

shisha-e-atishin rukh-e-pur nur

araq az khat chukida roghan-e-mor

bas ke hun baad-e-marg bhi nigaran

mardumak se hai khal bar lab-e-gor

bar lati hai dana hae sarishk

mizha hai resha-e-raz-e-angur

zulm karna gadae ashiq par

nahin shahan-e-husn ka dastur

dosto mujh sitam rasida se

dushmani hai wisal ka mazkur

zindagani pe etimad ghalat

hai kahan qaisar aur kahan faghfur

kije jun ashk aur qatra zani

ai asad hai hanoz dili dur