طاؤس نمط داغ کے گر رنگ نکالوں

طاؤس نمط داغ کے گر رنگ نکالوں

یک فردِ نسب نامۂ نیرنگ نکالوں

کُو تیزیٔ رفتار کہ صحرا سے زمیں کو

جوں قمریٔ بسمل تپش آہنگ نکالوں

دامانِ شفق طرفِ نقابِ مہِ نو ہے

ناخن کو جگر کاوی میں بے رنگ نکالوں

کیفیتِ دیگر ہے فشارِ دلِ خونیں

یک غنچہ سے صد خُمِ مے گل رنگ نکالوں

پیمانۂ وسعت کدۂ شوق ہوں اے رشک

محفل سے مگر شمع کو دل تنگ نکالوں

گر ہو بلدِ شوق مری خاک کو وحشت

صحرا کو بھی گھر سے کئی فرسنگ نکالوں

فریاد اسدؔ غفلتِ رسوائیٔ دل سے

کس پردے میں فریاد کی آہنگ نکالوں

taus namat dagh ke gar rang nikalun

yak fard-e-nasab nama-e-nairang nikalun

ku tezi-e-raftar ke sahra se zamin ko

jun qamari-e-bismil tapish ahang nikalun

daman-e-shafaq taraf-e-naqab-e-mah-e-nau hai

nakhun ko jigar kawi mein be rang nikalun

kaifiyat-e-digar hai fishar-e-dil-e-khunin

yak ghuncha se sad khum-e-mai gul rang nikalun

paimana-e-wusat kada-e-shauq hun ai rashk

mahfil se magar shama ko dil tang nikalun

gar ho balad-e-shauq miri khak ko wahshat

sahra ko bhi ghar se kai farsang nikalun

fariyad asad ghaflat-e-ruswai-e-dil se

kis parde mein fariyad ki ahang nikalun