کیا ضعف میں امید کو دل تنگ نکالوں

کیا ضعف میں امید کو دل تنگ نکالوں

میں خار ہوں آتش میں چبھوں رنگ نکالوں

نے کوچۂ رسوائی و زنجیر پریشاں

کس پردے میں فریاد کی آہنگ نکالوں

یک نشو و نما جا نہیں جولانِ ہوس کو

ہر چند بہ مقدارِ دلِ تنگ نکالوں

گر جلوۂ خورشید خریدارِ وفا ہو

جوں ذرۂ صد آئینہ بے زنگ نکالوں

افسردۂ تمکیں ہے نفس گرمی احباب

پھر شیشے سے عطرِ شررِ سنگ نکالوں

ضعف آئینہ پردازیٔ دستِ دگراں ہے

تصویر کے پردے میں مگر رنگ نکالوں

ہے غیرتِ الفت کہ اسدؔ اُس کی ادا پر

گر دیدہ و دل صلح کریں جنگ نکالوں

kya zof mein ummid ko dil tang nikalun

main khar hun atish mein chubhun rang nikalun

ne kucha-e-ruswai-o-zanjir pareshan

kis parde mein fariyad ki ahang nikalun

yak nashw-o-numa ja nahin jaulan-e-hawas ko

har chand ba miqdar-e-dil-e-tang nikalun

gar jalwa-e-khurshid kharidar-e-wafa ho

jun zarra-e-sad aina be zang nikalun

afsurda-e-tamkin hai nafas garmi ahbab

phir shishe se itr-e-sharar-e-sang nikalun

zof aina pardazi-e-dast-e-digaran hai

taswir ke parde mein magar rang nikalun

hai ghairat-e-ulfat ke asad us ki ada par

gar dida-o-dil sulh karen jang nikalun