کُو بیابانِ تمنا و کجا جولانِ عجز

کُو بیابانِ تمنا و کجا جولانِ عجز

آبلے پا کے ہیں یاں رفتار کو دندانِ عجز

ہو قبولِ کم نگاہی تحفۂ اہلِ نیاز

اے دل و اے جانِ ناز اے دین و اے ایمانِ عجز

بوسۂ پا انتخابِ بد گمانی ہائے حسن

یاں ہجومِ عجز سے تا سجدہ ہے جولانِ عجز

حسن کو غنچوں سے ہے پوشیدہ چشمی ہائے ناز

عشق نے وا کی ہے ہر یک خار سے مژگانِ عجز

اضطرابِ نارسائی مایۂ شرمندگی

ہے عرق ریزیٔ خجلت جوششِ طوفانِ عجز

وہ جہاں مسند نشینِ بارگاہِ ناز ہو

قامتِ خوباں ہو محرابِ نیازستانِ عجز

بس کہ بے پایاں ہے صحرائے محبت اے اسدؔ

گرد باد اس راہ کا ہے عقدۂ پیمانِ عجز

ku bayaban-e-tamanna-o-kuja jaulan-e-ijz

able pa ke hain yan raftar ko dandan-e-ijz

ho qubul-e-kam nigahi tohfa-e-ahl-e-niyaz

ai dil-o-ai jan-e-naz ai din-o-ai iman-e-ijz

bosa-e-pa intikhab-e-bad gumani hae husn

yan hujum-e-ijz se ta sajda hai jaulan-e-ijz

husn ko ghunchon se hai poshida chashmi ha-e-naz

ishq ne wa ki hai har yak khar se mizhgan-e-ijz

iztirab-e-narasai maya-e-sharmindagi

hai araq rezi-e-khajlat joshish-e-tufan-e-ijz

wo jahan masnad nashin-e-bargah-e-naz ho

qamat-e-khuban ho mehrab-e-niyazsitan-e-ijz

bas ke be payan hai sahra-e-mohabbat ai asad

gard-e-bad is rah ka hai uqda-e-paiman-e-ijz