بہرِ عرضِ حالِ شبنم ہے رقم ایجاد گل

بہرِ عرضِ حالِ شبنم ہے رقم ایجاد گل

ظاہرا ہے اس چمن میں لالِ مادر زاد گل

گر کرے انجام کو آغاز ہی میں یاد گل

غنچے سے منقارِ بلبل وار ہو فریاد گل

گر بہ بزمِ باغ کھینچے نقشِ روئے یار کو

شمع ساں ہو جائے قطِّ خامۂ بہزاد گل

دست رنگیں سے جو رُخ پروا کرے زلفِ رسا

شاخِ گل میں ہو نہاں جوں شانہ در شمشاد گل

سعیٔ عاشق ہے فروغ افزائے آبِ روئے کار

ہے شرارِ تیشہ بہرِ تربتِ فرہاد گل

ہے تصور صافیٔ قطعِ نظر از غیرِ یار

لختِ دل سے لاوے ہے شمعِ خیال آباد گل

گلشن آبادِ دلِ مجروح میں ہو جائے ہے

غنچۂ پیکانِ شاخِ ناوکِ صیاد گل

برقِ سامانِ نظر ہے جلوۂ بے باکِ حسن

شمعِ خلوت خانہ کیجے ہر چہ بادا باد گل

خاک ہے عرضِ بہارِ صد نگارستاں اسدؔ

حسرتیں کرتی ہے میری خاطرِ آزاد گل

bahr-e-arz-e-hal-e-shabnam hai raqam ijad gul

zahiran hai is chaman mein lal-e-madar zad-e-gul

gar kare anjam ko aghaz hi mein yad gul

ghunche se minqar-e-bulbul war ho fariyad gul

gar ba bazm-e-bagh khinche naqsh-e-ru-e-yar ko

shama san ho jae qat-e-khama-e-behzad gul

dast-e-rangin se jo rukh parwa kare zulf-e-rasa

shakh-e-gul mein ho nihan jun shana dar shamshad gul

sai-e-ashiq hai farogh afza-e-ab-e-roe kar

hai sharar-e-tesha bahr-e-turbat-e-farhad gul

hai tasawwur safi-e-qat-e-nazar az ghair-e-yar

lakht-e-dil se lawe hai sham-e-khayal abad gul

gulshan abad-e-dil-e-majruh mein ho jae hai

ghuncha-e-paikan-e-shakh-e-nawak-e-sayyad gul

barq-e-saman-e-nazar hai jalwa-e-be bak-e-husn

sham-e-khalwat khana kije har cha bada bad-e-gul

khak hai arz-e-bahar-e-sad nigaristan asad

hasraten karti hai meri khatir-e-azad gul