ربطِ تمیزِ اعیاں دُردِ مئے صدا ہے

ربطِ تمیزِ اعیاں دُردِ مئے صدا ہے

اعمیٰ کو سرمۂ چشم آوازِ آشنا ہے

موئے دماغِ وحشت سر رشتۂ فنا ہے

شیرازۂ دو عالم یک آہِ نارسا ہے

دیوانگی ہے تجھ کو درسِ خرام دینا

موجِ بہار یکسر زنجیرِ نقشِ پا ہے

پروانے سے ہو شاید تسکینِ شعلۂ شمع

آسایشِ وفا ہا بے تابیٔ جفا ہے

اے اضطرابِ سرکش یک سجدہ وار تمکیں

میں بھی ہوں شمعِ کشتہ گر داغ خوں بہا ہے

نے حسرتِ تسلی نے ذوقِ بے قراری

یک درد و صد دوا ہے یک دست و صد دعا ہے

دریائے مے ہے ساقی لیکن خمار باقی

تا کوچہ دادنِ موج خمیازہ آشنا ہے

وحشت نہ کھینچ قاتل حیرت نفس ہے بسمل

جب نالہ خوں ہو غافل تاثیر کیا بلا ہے

بت خانے میں اسدؔ بھی بندہ تھا گاہ گاہے

حضرت چلے حرم کو اب آپ کا خدا ہے

rabt-e-tamiz-e-aayan durd-e-mai-e-sada hai

aama ko surma-e-chashm-e-awaz-e-ashna hai

mu-e-dimagh-e-wahshat sar-e-rishta-e-fana hai

shiraza-e-do alam yak ah-e-narasa hai

diwangi hai tujh ko dars-e-khiram dena

mauj-e-bahar yaksar zanjir-e-naqsh-e-pa hai

parwane se ho shayad taskin-e-shola-e-shama

asaish-e-wafa ha be tabi-e-jafa hai

ai iztirab-e-sarkash yak sajda war tamkin

main bhi hun sham-e-kushta gar dagh khun baha hai

ne hasrat-e-tasalli ne zauq-e-be qarari

yak dard-o-sad dawa hai yak dast-o-sad dua hai

dariya-e-mai hai saqi lekin khumar baqi

ta kucha dadin-e-mauj-e-khamyaza ashna hai

wahshat na khinch qatil hairat nafas hai bismil

jab nala khun ho ghafil tasir kya bala hai

but khane mein asad bhi banda tha gah gahe

hazrat chale haram ko ab ap ka khuda hai