جاتا ہوں جدھر سب کی اُٹھے ہے اُدھر انگشت

جاتا ہوں جدھر سب کی اُٹھے ہے اُدھر انگشت

یک دست جہاں مجھ سے پھرا ہے مگر انگشت

الفتِ مژگاں میں جو انگشت نما ہوں

لگتی ہے مجھے تیر کے مانند ہر انگشت

ہر غنچۂ گل صورتِ یک قطرۂ خوں ہے

دیکھا ہے کسو کا جو حنا بستہ سر انگشت

گرمی ہے زباں کی سببِ سوختنِ جاں

ہر شمع شہادت کو ہے یاں سر بسر انگشت

خوں دل میں جو میرے نہیں باقی تو پھر اس کی

جوں ماہیٔ بے آب تڑپتی ہے ہر انگشت

شوخی تری کہہ دیتی ہے احوال ہمارا

رازِ دلِ صد پارہ کی ہے پردہ در انگشت

بس رتبے میں باریکی و نرمی ہے کہ جوں گل

آتی نہیں پنجے میں بس اس کے نظر انگشت

افسوس کہ دنداں کا کیا رزق فلک نے

جن لوگوں کی تھی درخورِ عقدِ گہر انگشت

کافی ہے نشانی تِری چھلّے کا نہ دینا

خالی مجھے دِکھلا کے بہ وقتِ سفر انگشت

لکھتا ہوں اسدؔ سوزشِ دل سے سخنِ گرم

تا رکھ نہ سکے کوئی مرے حرف پر انگشت

jata hun jidhar sab ki uthe hai idhar angusht

yak dast jahan mujh se phira hai magar angusht

ulfat-e-mizhgan mein jo angishat numa hun

lagti hai mujhe tir ke manind har angusht

har ghuncha-e-gul surat-e-yak qatra-e-khun hai

dekha hai kisu ka jo hina basta sar angusht

garmi hai zaban ki sabab-e-sokhtan-e-jan

har shama shahadat ko hai yan sar basar angusht

khun dil mein jo mere nahin baqi to phir us ki

jun mahi-e-be ab tarapti hai har angusht

shokhi tiri kah deti hai ahwal hamara

raz-e-dil-e-sad para ki hai parda dar angusht

bas rutbe mein bariki-o-narmi hai ke jun gul

ati nahin panje mein bas us ke nazar angusht

afsos ke dandan ka kiya rizq falak ne

jin logon ki thi darkhur-e-aqd-e-guhar angusht

kafi hai nishani tiri chhile ka na dena

khali mujhe dikhla ke ba waqt-e-safar angusht

likhta hun asad sozish-e-dil se sukhan-e-garm

ta rakh na sake koi mire harf par angusht