بس کہ زیرِ خاک با آبِ طراوت راہ ہے

بس کہ زیرِ خاک با آبِ طراوت راہ ہے

ریشے سے ہر تخم کا دَلْو اندرونِ چاہ ہے

عکسِ گل ہائے سمن سے چشمہ ہائے باغ میں

فلسِ ماہی آئینہ پردازِ داغِ ماہ ہے

واں سے ہے تکلیفِ عرضِ بے دماغی ہائے دل

یاں صریرِ خامہ مجھ کو نالۂ جانکاہ ہے

حسن و رعنائی میں وہمِ صد سر و گردن ہے فرق

سرو کے قامت پہ گل یک دامنِ کوتاہ ہے

رشک ہے آسائشِ اربابِ غفلت پر اسدؔ

پیچ تابِ دل نصیبِ خاطرِ آگاہ ہے

bas ke zer-e-khak ba ab-e-tarawat rah hai

reshe se har tukhm ka dalw andarun-e-chah hai

aks-e-gul ha-e-saman se chashma ha-e-bagh mein

fals-e-mahi aina pardaz-e-dagh-e-mah hai

wan se hai taklif-e-arz-e-be dimaghi ha-e-dil

yan sarir-e-khama mujh ko nala-e-jankah hai

husn-o-raanai mein wahm-e-sad sar-o-gardan hai farq

sarw ke qamat pe gul yak daman-e-kotah hai

rashk hai asaish-e-arbab-e-ghaflat par asad

pech tab-e-dil nasib-e-khatir-e-agah hai