Arooz is now on the App Store, for iPhone and iPad. Download →

All poetry

دلا عبث ہے تمنائے خاطر افروزی

Mirza Ghalib (1797–1869)

دلا عبث ہے تمنائے خاطر افروزی

کہ بوسۂ لبِ شیریں ہے اور گلو سوزی

طلسمِ آئینہ زانوئے فکر ہے غافل

ہنوز حسن کو ہے سعیٔ جلوہ اندوزی

ہوئی ہے سوزشِ دل بس کہ داغِ بے اثری

اُگی ہے دودِ جگر سے شبِ سیہ روزی

بہ پَر فشانیٔ پروانۂ چراغِ مزار

کہ بعدِ مرگ بھی ہے لذتِ جگر سوزی

تپش تو کیا نہ ہوئی مشقِ پر فشانی بھی

رہا میں ضعف سے شرمندۂ نو آموزی

اسدؔ ہمیشہ پئے کفشِ پائے سیم تناں

شعاعِ مہر سے کرتا ہے چرخ زر دوزی