گدائے طاقتِ تقریر ہے زباں تجھ سے

گدائے طاقتِ تقریر ہے زباں تجھ سے

کہ خامشی کو ہے پیرایۂ بیاں تجھ سے

فسردگی میں ہے فریادِ بے دلاں تجھ سے

چراغِ صبح و گلِ موسمِ خزاں تجھ سے

بہارِ حیرتِ نظارہ سخت جانی ہے

حنائے پائے اجل خونِ کشتگاں تجھ سے

پری بہ شیشہ و عکسِ رخ اندر آئینہ

نگاہِ حیرتِ مشاطہ خوں فشاں تجھ سے

طراوتِ سحر ایجادی اثر یک سُو

بہارِ نالہ و رنگینیٔ فغاں تجھ سے

چمن چمن گلِ آئینہ در کنارِ ہوس

امید محوِ تماشائے گلستاں تجھ سے

نیاز پردۂ اظہارِ خود پرستی ہے

جبینِ سجدہ فشاں تجھ سے آستاں تجھ سے

بہانہ جوئیٔ رحمت کمیں گرِ تقریب

وفائے حوصلہ و رنجِ امتحاں تجھ سے

اسدؔ طلسمِ قفس میں رہے قیامت ہے

خرام تجھ سے صبا تجھ سے گلستاں تجھ سے

gadae taqat-e-taqrir hai zaban tujh se

ke khamushi ko hai pairaya-e-bayan tujh se

fasurdagi mein hai fariyad-e-be dalan tujh se

charagh-e-subh-o-gul-e-mausam-e-khizan tujh se

bahar-e-hairat-e-nazzara sakht jani hai

hina-e-pae ajal khun-e-kushtgan tujh se

pari ba shisha-o-aks-e-rukh andar aina

nigah-e-hairat-e-mashshata khun fishan tujh se

tarawat-e-sahar ijadi asar yak su

bahar-e-nala-o-rangini-e-fughan tujh se

chaman chaman gul-e-aina dar kanar-e-hawas

umid mahw-e-tamasha-e-gulsitan tujh se

niyaz parda-e-izhar-e-khud parasti hai

jabin-e-sajda fishan tujh se astan tujh se

bahana joi-e-rahmat kamin gar-e-taqrib

wafa-e-hausla-o-ranj-e-imtihan tujh se

asad tilism-e-qafas mein rahe qayamat hai

khiram tujh se saba tujh se gulsitan tujh se