صبح سے معلوم آثارِ ظہورِ شام ہے

صبح سے معلوم آثارِ ظہورِ شام ہے

غافلاں آغازِ کار آئینۂ انجام ہے

بس کہ ہے صیاد راہِ عشق میں محوِ کمیں

جادۂ رہ سر بہ سر مژگانِ چشمِ دام ہے

بس کہ تیرے جلوۂ دیدار کا ہے اشتیاق

ہر بتِ خرشید طلعت آفتابِ بام ہے

مستعدِ قتلِ یک عالم ہے جلاّدِ فلک

کہکشاں موجِ شفق میں تیغِ خوں آشام ہے

کیا کمالِ عشق نقص آبادِ گیتی میں ملے

پختگی ہائے تصور یاں خیالِ خام ہے

ہو جہاں وہ ساقیٔ خرشید رُو مجلس فروز

واں اسدؔ تارِ شعاعِ مہر خطِّ جام ہے

subh se maalum asar-e-zuhur-e-sham hai

ghafilan aghaz-e-kar aina-e-anjam hai

bas ke hai sayyad rah-e-ishq mein mahw-e-kamin

jada-e-rah sar ba sar mizhgan-e-chashm-e-dam hai

bas ke tere jalwa-e-didar ka hai ishtiyaq

har but-e-khurshid talat aftab-e-bam hai

mustaid-e-qatl-e-yak alam hai jallad-e-falak

kahkashan mauj-e-shafaq mein tegh-e-khun asham hai

kya kamal-e-ishq naqs abad-e-giti mein mile

pukhtagi ha-e-tasawwur yan khayal-e-kham hai

ho jahan wo saqi-e-khurshid ru majlis faroz

wan asad tar-e-shua-e-mehr khat-e-jam hai