نہ بندھا تھا بہ عدم نقشِ دلِ مور ہنوز

نہ بندھا تھا بہ عدم نقشِ دلِ مور ہنوز

تب سے ہے یاں دہنِ یار کا مذکور ہنوز

سبزہ ہے نوکِ زبانِ دہنِ گور ہنوز

حسرتِ عرضِ تمنا میں ہوں رنجور ہنوز

صد تجلی کدہ ہے صرفِ جبینِ غربت

پیرہن میں ہے غبارِ شررِ طور ہنوز

زخمِ دل میں ہے نہاں غنچۂ پیکانِ نگار

جلوۂ باغ ہے در پردۂ ناسور ہنوز

پا پُر از آبلہ راہِ طلبِ مے میں ہوا

ہاتھ آیا نہیں یک دانۂ انگور ہنوز

گل کھلے غنچے چٹکنے لگے اور صبح ہوئی

سر خوشِ خواب ہے وہ نرگسِ مخمور ہنوز

اے اسدؔ تیرگی بختِ سیہ ظاہر ہے

نظر آتی نہیں صبحِ شبِ دیجور ہنوز

na bandha tha ba adam naqsh-e-dil-e-mor hanoz

tab se hai yan dahan-e-yar ka mazkur hanoz

sabza hai nok-e-zaban-e-dahan-e-gor hanoz

hasrat-e-arz-e-tamanna mein hun ranjur hanoz

sad tajalli kada hai sirf-e-jabin-e-ghurbat

pairahan mein hai ghubar-e-sharar-e-tur hanoz

zakhm-e-dil mein hai nihan ghuncha-e-paikan-e-nigar

jalwa-e-bagh hai dar parda-e-nasur hanoz

pa pur az abla rah-e-talab-e-mai mein hua

hath aya nahin yak dana-e-angur hanoz

gul khule ghunche chatakne lage aur subh hui

sar khush-e-khwab hai wo nargis-e-makhmur hanoz

ai asad tirgi-e-bakht-e-siyah zahir hai

nazar ati nahin subh-e-shab-e-dijaur hanoz