درد ہو دل میں تو دوا کیجے — مرزا غالب (Mirza Ghalib)

درد ہو دل میں تو دوا کیجے

دل ہی جب درد ہو تو کیا کیجے

ہم کو فریاد کرنی آتی ہے

آپ سنتے نہیں تو کیا کیجے

ان بتوں کو خدا سے کیا مطلب

توبہ توبہ خدا خدا کیجے

رنج اٹھانے سے بھی خوشی ہو گی

پہلے دل درد آشنا کیجے

عرضِ شوخی نشاطِ عالم ہے

حسن کو اور خود نما کیجے

دشمنی ہو چکی بہ قدرِ وفا

اب حقِ دوستی ادا کیجے

موت آتی نہیں کہیں غالبؔ

کب تک افسوس زیست کا کیجے