تماشائے جہاں مفتِ نظر ہے — مرزا غالب (Mirza Ghalib)

تماشائے جہاں مفتِ نظر ہے

کہ یہ گل زار باغِ رہ گزر ہے

جہاں شمعِ خموشی جلوہ گر ہے

پرِ پروانگاں بالِ شرر ہے

بہ جیبِ اشکِ چشم سرمہ آلود

مسی مالیدہ دندانِ گہر ہے

شفق ساں موجۂ خوں ہے رگِ خواب

کہ مژگانِ کشودہ نیشتر ہے

کرے ہے روئے روشن آفتابی

غبارِ خطِ رخ گردِ سحر ہے

ہوئی یک عمر صرفِ مشقِ نالہ

اثر موقوف بر عمرِ دگر ہے

اسدؔ ہوں میں پر افشانِ رمیدن

سوادِ شعر در گردِ سفر ہے