ستارہ

قمر کا خوف کہ ہے خطرہء سحر تجھ کو

مآل حسن کی کیا مل گئی خبر تجھ کو؟

متاع نور کے لٹ جانے کا ہے ڈر تجھ کو

ہے کیا ہراس فنا صورت شرر تجھ کو؟

زمیں سے دور دیا آسماں نے گھر تجھ کو

مثال ماہ اڑھائی قبائے زر تجھ کو

!غضب ہے پھر تری ننھی سی جان ڈرتی ہے

تمام رات تری کانپتے گزرتی ہے

چمکنے والے مسافر! عجب یہ بستی ہے

جو اوج ایک کا ہے ، دوسرے کی پستی ہے

اجل ہے لاکھوں ستاروں کی اک ولادت مہر

فنا کی نیند مے زندگی کی مستی ہے

وداع غنچہ میں ہے راز آفرینش گل

!عدم ، عدم ہے کہ آئینہ دار ہستی ہے

سکوں محال ہے قدرت کے کارخانے میں

ثبات ایک تغیر کو ہے زمانے میں

qamar ka khauf ke hai khatrah sahar tujh ko

maal-e-husn ki kya mil gai khabar tujh ko?

mata-e-nur ke lut jane ka hai dar tujh ko

hai kya hiras-e-fana surat-e-sharar tujh ko?

zamin se dur diya asman ne ghar tujh ko

misal-e-mah urhai qaba-e-zar tujh ko

!ghazab hai phir tiri nanhi si jan darti hai

tamam rat tiri kanpte guzarti hai

chamakne wale musafir! ajab ye basti hai

jo auj ek ka hai, dusre ki pasti hai

ajal hai lakhon sitaron ki ik wiladat-e-mehr

fana ki nind mai zindagi ki masti hai

wida-e-ghuncha mein hai raz-e-afrinish-e-gul

!adam, adam hai ke aina dar-e-hasti hai

sukun muhal hai qudrat ke karkhane mein

sabat ek taghayyur ko hai zamane mein