فراق

تلاش گوشہء عزلت میں پھر رہا ہوں میں

یہاں پہاڑ کے دامن میں آ چھپا ہوں میں

شکستہ گیت میں چشموں کے دلبری ہے کمال

دعائے طفلک گفتار آزما کی مثال

ہے تخت لعل شفق پر جلوس اختر شام

بہشت دیدہء بینا ہے حسن منظر شام

سکوت شام جدائی ہوا بہانہ مجھے

کسی کی یاد نے سکھلا دیا ترانہ مجھے

یہ کیفیت ہے مری جان ناشکیبا کی

مری مثال ہے طفل صغیر تنہا کی

اندھیری رات میں کرتا ہے وہ سرود آغاز

صدا کو اپنی سمجھتا ہے غیر کی آواز

یونہی میں دل کو پیام شکیب دیتا ہوں

شب فراق کو گویا فریب دیتا ہوں

talash-e-goshah uzlat mein phir raha hun main

yahan pahar ke daman mein a chhupa hun main

shikasta git mein chashmon ke dilbari hai kamal

dua-e-tiflak-e-guftar azma ki misal

hai takht-e-laal-e-shafaq par julus-e-akhtar-e-sham

bahisht dedah bina hai husn-e-manzar-e-sham

sukut-e-sham-e-judai hua bahana mujhe

kisi ki yad ne sukhla diya tarana mujhe

ye kaifiyat hai miri jan-e-nashikeba ki

miri misal hai tifl-e-saghir-e-tanha ki

andheri rat mein karta hai wo surud aghaz

sada ko apni samajhta hai ghair ki awaz

yunhi mein dil ko payam-e-shakeb deta hun

shab-e-firaq ko goya fareb deta hun