جگنو

جگنو کی روشنی ہے کاشانہء چمن میں

یا شمع جل رہی ہے پھولوں کی انجمن میں

آیا ہے آسماں سے اڑ کر کوئی ستارہ

یا جان پڑ گئی ہے مہتاب کی کرن میں

یا شب کی سلطنت میں دن کا سفیر آیا

غربت میں آ کے چمکا، گمنام تھا وطن میں

تکمہ کوئی گرا ہے مہتاب کی قبا کا

ذرہ ہے یا نمایاں سورج کے پیرہن میں

حسن قدیم کی یہ پوشیدہ اک جھلک تھی

لے آئی جس کو قدرت خلوت سے انجمن میں

چھوٹے سے چاند میں ہے ظلمت بھی روشنی بھی

نکلا کبھی گہن سے، آیا کبھی گہن میں

پروانہ اک پتنگا، جگنو بھی اک پتنگا

وہ روشنی کا طالب، یہ روشنی سراپا

ہر چیز کو جہاں میں قدرت نے دلبری دی

پروانے کو تپش دی، جگنو کو روشنی دی

رنگیں نوا بنایا مرغان بے زباں کو

گل کو زبان دے کر تعلیم خامشی دی

نظارئہ شفق کی خوبی زوال میں تھی

چمکا کے اس پری کو تھوڑی سی زندگی دی

رنگیں کیا سحر کو، بانکی دلھن کی صورت

پہنا کے لال جوڑا شبنم کی آرسی دی

سایہ دیا شجر کو، پرواز دی ہوا کو

پانی کو دی روانی، موجوں کو بے کلی دی

یہ امتیاز لیکن اک بات ہے ہماری

جگنو کا دن وہی ہے جو رات ہے ہماری

حسن ازل کی پیدا ہر چیز میں جھلک ہے

انساں میں وہ سخن ہے، غنچے میں وہ چٹک ہے

یہ چاند آسماں کا شاعر کا دل ہے گویا

واں چاندنی ہے جو کچھ، یاں درد کی کسک ہے

انداز گفتگو نے دھوکے دیے ہیں ورنہ

نغمہ ہے بوئے بلبل، بو پھول کی چہک ہے

کثرت میں ہو گیا ہے وحدت کا راز مخفی

جگنو میں جو چمک ہے وہ پھول میں مہک ہے

یہ اختلاف پھر کیوں ہنگاموں کا محل ہو

ہر شے میں جبکہ پنہاں خاموشی ازل ہو

jugnu ki raushni hai kashanah chaman mein

ya shama jal rahi hai phulon ki anjuman mein

aya hai asman se ur kar koi sitara

ya jan par gai hai mahtab ki kiran mein

ya shab ki saltanat mein din ka safir aya

ghurbat mein a ke chamka, gumnam tha watan mein

tukma koi gira hai mahtab ki qaba ka

zarra hai ya numayan suraj ke pairahan mein

husn-e-qadim ki ye poshida ik jhalak thi

le ai jis ko qudrat khalwat se anjuman mein

chhote se chand mein hai zulmat bhi raushni bhi

nikla kabhi gahan se, aya kabhi gahan mein

parwana ik patanga, jugnu bhi ik patanga

wo raushni ka talib, ye raushni sarapa

har chiz ko jahan mein qudrat ne dilbari di

parwane ko tapish di, jugnu ko raushni di

rangin nawa banaya murghan-e-be zaban ko

gul ko zaban de kar taalim-e-khamushi di

nazareh shafaq ki khubi zawal mein thi

chamka ke us pari ko thori si zindagi di

rangin kya sahar ko, banki dalhan ki surat

pahna ke lal jora shabnam ki arsi di

saya diya shajar ko, parwaz di hawa ko

pani ko di rawani, maujon ko be kali di

ye imtiyaz lekin ik bat hai hamari

jugnu ka din wahi hai jo rat hai hamari

husn-e-azal ki paida har chiz mein jhalak hai

insan mein wo sukhan hai, ghunche mein wo chutak hai

ye chand asman ka shayar ka dil hai goya

wan chandni hai jo kuchh, yan dard ki kasak hai

andaz-e-guftugu ne dhoke diye hain warna

naghma hai bu-e-bulbul, bu phul ki chahak hai

kasrat mein ho gaya hai wahdat ka raz makhfi

jugnu mein jo chamak hai wo phul mein mahak hai

ye ikhtilaf phir kyun hangamon ka mahal ho

har shai mein jabke pinhan khamoshi-e-azal ho